Automarket of Mongolia

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

Н.Батмөнх: "Мөсөн өргөө" ордныг байгуулахад уригдсан гадаадынхан "Энэ хүмүүс байхад бидний хэрэг байна уу" гэж хэлсэн

IKON.MN

Төслийг хэрэгжүүлэгч “Степпе Арена” ХХК-ийн гүйцэтгэх захирал Н.Батмөнх:

-Монголд анх удаа өвөл зуны битүү ордон болох “Мөсөн өргөө” ордон ашиглалтанд орох гэж байна. Энэхүү ордон ашиглалтанд орсоноор чухам ямар боломжууд нээгдэх вэ?

-Боломж гэдэг утгаар нь ярьвал асар өргөн ойлголт болно л доо. Илүү тодруулаад нарийсгаад хэлвэл хүний хөгжилд зориулсан төсөл. Монгол хүний хөгжил бол өөрөө Монгол улсын нийгмийн хөгжлийг авч явна гэсэн л үг шүү дээ.

Энэхүү ордон ашиглалтанд орсоноор мэргэжилийн тамирчин гэлтгүй энгийн хүмүүс ч чөлөөтэй ая тухтай цагаа өнгөрүүлэх, эрүүл мэнд бие бялдар цаашлаад цагаа зөв боловсон өнгөрүүлэх таатай нэг орчин Монгол улсын нийслэл Улаанбаатар хотод бий болж байна.

-Мөсөн ордон хэзээ ашиглалтанд орох вэ?

-9-р сарын 29-нд нээлтээ хийж, ашиглалтанд оруулахаар ажиллаж байна.

-“Мөсөн өргөө” ордон төслийг хэрэгжүүлэхдээ юунд илүү анхаарсан бэ?

-Барилгаа барихдаа бид аль болох үндэсний компаниуд, үндэсний үйлдвэрлэгчидийг нийгмийн хариуцлагын хүрээнд бодлогын дор татаж оролцуулсан. Зураг төсөл хийхдээ Канадуудаас зөвлөгөө авч байсан.

Мөсөн талбайн хөргүүрийг хийхдээ Австрийн компаниас зөвлөгөө авч байх жишээтэй.

Олон улсын тендер зарлахад Америк, Орос, Герман Канад, Австри, Шведийн материал ирсэн. Тэдний дундаас Австрийн “Эс Ти” гэдэг компанийг сонгож хамтарч ажилласан.

Зураглалыг нь “Анаграм” ХХК-ийн Б.Золбоо хийсэн.  Бидэнд барилгын ажилыг хийхдээ хоорондоо маргалдах үе ч гарч байлаа. “Гадаадынханаар хийлгүүлье, бид чадахгүй шүү дээ” гээд л. Тэгээд олон улсын тендер зарлая гэж ярьцгаасан.

Гэтэл нэг өдөр манай хяналтын багийн инженер зөвлөсөн. “Хоёулаа Хөшигтийн хөндий явж үзье. Тэнд 75 м алслалттай дээвэр хийчихсэн байна. Монголчууд хийсэн гэж байна” гэхэд нь эхэндээ итгэж өгөөгүй. Харин Монголчуудаа хийснийг нь нүдээр үзэж хараад бид нар хийцээ гадаадад хийдгээрээ хийлгэе, Монголд төмрийн үйлдвэр байхгүй тул тэгээд Монголчуудаараа угсруулья гэдэг шийдэлд хүрсэн. Ингээд Оюутолгойд гүний уурхайн угсралтын ажил хийж байсан Монголын компани болох “NBIK”-ийн   залуучууд хийсэн. Бид нар хаширлаад гадаадын төмрийн үйлдвэрээс инженерүүдийг нь дуудсан. Гэтэл тэд ирсэнийхээ дараа, “энэ хүмүүс байхад бидний хэрэг байна уу” гэж хэлсэн.

-“NBIK”-ийн залуучуудаас өөр сайн жишээ байна уу?

-Өрсөлдөх чадвартай Монгол компаниуд бий. “Гангар” гээд Монгол компани дээврийг нь хийсэн. Энэ бол огторгуйн хийцлэл буюу баганагүй бүтэц. Монголдоо анх удаа 70 метрийн урт, хоорондоо залгаасгүй, нэг ч хадаас шөвөг ороогүй, төмрөө хувилж гаргаад 2 метрийн өндөртэй гангаа явуулаад, 70 метрийн урттай гаргаад эмхэрдэж ороодог тийм машин оруулаад хийсэн бүтээн байгуулалт. Энэ бүтээн байгуулалт өөрөө маш том ур чадвар, туршлагыг бий болгодог. Манай мөсөн талбай Олон улсын олимпын хорооноос мөрддөг хэмжээс буюу өргөн нь 30, урт нь 60 м байдаг. Энэ талбайг олон улсын тэмцээн уралдаан явах стандарт гэж ойлгож болно.

Мөсөн талбайгаа хайлуулахгүйгээр, дулаанаа хадгалдаг шалаар сольж, олон төрлийн тэмцээн зохион явуулах боломжтой

Б.Баасансүрэн: “Мөсөн өргөө” ордоны барилгын төслийн удирдагч

-“Мөсөн өргөө” ордон урьд өмнө хийж бүтээж байгаагүй цоо шинэ бүтээн байгуулалт. Барилгын төслийн хувьд юугаараа илүү давуу онцлогтой вэ?

Мөсөө хайлуулахгүйгээр дулаанаа хадгалдаг шалаар солиод, олон төрлийн тэмцээн явуулах боломжтой.

Өөрөөр хэлбэл мөсөн талбайгаа хайлуулахгүйгээр сагс, волейвол, гимнастик бөхийн барилдаан гэх мэт спортын олон төрлийн тэмцээн, урлаг соёлын арга хэмжээ зохион байгуулж болно гэсэн үг л дээ. Дээр нь манай гэрэлтүүлэг хоккейн шаардлагаа бүрэн хангасан өндөр нягтралтай  фокус ,харагдалт нь бүх урлаг спортод зориулсан солбиж асдаг программтай.

-Үе үеийн Монголчуудын мөрөөдлийг биелүүлэх түүхэн төслийн үнэ цэнийг та хэрхэн тодорхойлж хэлэх вэ?

-Би дүгнэж цэгнэхээс илүү хөндлөнгийн дүгнэлт чухал байх. “Мөсөн өргөө” төсөл нь 2021 оны Олон Улсын үл хөдлөхийн шагналд нэр дэвшээд байгаа төдийгүй Монгол Улсынхаа олон нийтэд зориулсан шилдэг барилгаар шалгарсан.

Барилга байгууламжийн бүхий л хэсгийг Монголын үндэсний компаниуд хийсэн байгаа. Ер нь бол бид нар төслийн менежментийг олон улсын стандартын дагуу нягт хамтын ажиллагаан дунд зохион байгуулсан.

Гэхдээ ихэвчлэн Монгол компаниуд хийж бүтээсэн. Мэдээж хэрэг мөсний тоног төхөөрөмж , гэрэлтүүлгийн стандарт дээр нийлүүлэгч компанийн зөвлөмж туслалцааг авалгүй л яахав.

Та нарынхаа дуслуулсан хөлс бүрийг ирээдүйд бид амжилт болгон авчирна

"Хөх чононууд" клубын өсвөрийн тамирчид:

-Мөрөөдөл биелэх Мөсөн өргөө ордон маань хэдхэн хоногийн дараа нээгдэх гэж байна. “Мөсөн өргөө” өвөл зуны битүү ордондоо ирж тоглоцгоохыг тань харахад сайхан санагдлаа. Ямар мэдрэмж төрж байв?

-Маш гоё мэдрэмж төрж байна. Гэхдээ эхэндээ талбайд гарахад жаахан сүрдэж байсан. Задгай талбайд тоглож байсан болохоор бас л сүртэй гоё байна шүү.

Ер нь бол гадны том улсад тоглож байгаа мэт сэтгэгдэл төрлөө.

-Урьд нь Олон улсын тэмцээнд оролцож, гадны том Мөсөн ордонд тоглож байсан уу?

-2019 онд “Хонг Конг”-д очиж тоглох боломж олдож байсан.

-Урьд нь бэлтгэлээ хаана хийж байсан бэ?

-Гуравдугаар сургуулийн гадаа мөсөн талбайд хийж байсан. Гадаа хийдэг болохоор хүйтэн байдаг. Хэтэрхий хүйтэн өдөр гар, хуруу хөлдөх үе ч бий.

-Хавар задгай талбай хайлаад, урсаад алга болчихно. Тэр үед ямар мэдрэмж төрдөг вэ?

-Маш эвгүй, дотор нэг сонин болоод явчихдаг. Гулгах талбай олдохгүй болохоор их гунигладаг. Сэтгэл гутралын байдалд орох үе ч бий.

-Хайлдаггүй, урсдаггүй, улирал үл харгалзах, Олон улсын Олимпын хорооны стандартад нийцсэн энэ ордонг санаачилсан, бүтээн байгуулсан ах эгч нартаа юу гэж хэлмээр байна даа?

-Маш их баярлаж байгаа шүү. Та нарын дуслуулсан хөлс бүрийг ирээдүйд бид нар амжилт болгон, эргүүлж авчирч чадна аа. Бидэндээ итгээрэй.